098 690 42 28 (пн-пт: з 9 до 18 г.)

 

- По благословению Высокопреосвященнейшего Боголепа,
архиепископа Александрийского и Светловодского -

Жизнеописание священника Василия Слотвинского. Богослужебная информация.

Жизнеописание священника Василия Слотвинского.

 

 Будущий пастырь Василий Кириллович Слотвинский родился в 1848 году и происходил из духовного сословия. Родители его вели благочестивую жизнь, стараясь жить по заповедям Христовым. В доме царил молитвенный дух, и Василий с детства проникся им, укрепившись в желании служить Богу.

   Он окончил Одесскую Духовную Семинарию, где с жаждой впитывал в себя богословские знания.

   В 1872 году рукоположен во священника. Служил на различных приходах Херсонской епархии. С 1904 года назначен настоятелем храма в честь Казанской иконы Божией Матери с.Нерубайка, Александрийского уезда. Этот приход был уже седьмым со времени начала священнического служения. [1] Также о.Василий исполнял должность законоучителя церковно-приходской школы грамоты.

   У батюшки с супругой была большая семья, в которой было девять детей – три сына и шесть дочерей. Родители воспитывали их прежде всего своим примером веры, любви к Богу, усердия к богослужению, приветливого отношения к окружающим и добросовестности в исполнении своих обязанностей.

   Когда в 1917 году наступил кардинально новый период для страны в целом и Церкви в частности, о.Василий был уже далеко немолод по возрасту. Его сердцу, привыкшему всю жизнь славить Бога, живя в спокойном церковном укладе, было невыносимо больно наблюдать за происходящими событиями, когда Церковь фактически была сделана врагом государства. Он с глубоким душевным волнением воспринимал новости об убийствах своих собратьев-священнослужителей. Однако батюшка всегда помнил, что краеугольным камнем здания православной веры является Христос, и Его слова: "Се Аз с вами есмь до скончания века" (Мф., 28:20) придавали ему твердости духа.

   В 1919 году по Херсонской губернии прокатилась волна убийств священников от рук участников бандитских и большевицких группировок. Их жертвой 6 мая пал и о.Василий, приняв мученическую кончину в день памяти св. вмч.Георгия Победоносца. Газета "Одесский листок" в выпуске от 1 января 1920 года приводит список пострадавших священнослужителей, среди которых значится и о.Василий Слотвинский. [2]

 

 

Ссылки:

1. Справочная книга Херсонской епархии, 1906, с.366;

2. "Одесский листок", 1920, 1 января, №1.

 

 

Справочная книга Херсонской епархии, 1905, с.366-367;

 

 

 

 

Одесский листок, 1920, 1-го (1) января, №1, скорбный список

Приводим список священнослужителей Херсонской епархии, павших от рук злодеев в 1919 году:

священник Александр Смирягин местечка Новаго Буга, 6 мая 1919 года убит вместе с женой и двумя дочерьми;

священник Феодор Статкевич с.Богоявленска, 12 апреля убит при совершении погребения;

священник хутора Мешково Карп Малицкий, 17 июля расстрелян по приговору Николаевского трибунала за контрреволюционную деятельность;

священник города Берислава Василий Голоносов расстрелян;

священник села Нерубайки Василий Слотвинский (6 мая убит);

священник села Ивановки Александр Балануца (27 августа убит);

священник местечка Трикраты Николай Неплий (24 июня расстрелян Вознесенской черезвычайкой);

священник села Янополя Сергий Чернявский (16 сентября убит махновцами);

священник села Кагарлыка Михаил Соболев (16 сентября убит махновцами);

священник  Алексий Смердынский (16 сентября убит махновцами);

священник села Скалевого Александр Вильковский (16 сентября убит махновцами);

священник села Полтавки Антоний Заплатин (30 октября убит с женой и 4-мя дочерьми);

священник села Архангельского Василий Мосин (29 ноября убит махновцами);

священник посада Новой Праги Иаков Илличевский убит в доме;

протоиерей Никита Левицкий скоропостижно скончался при наведении на него ружья с требованием венчать разведенных трибуналом;

священник Иов Швачко село Федоровка, Александрийского уезда;

священник Никита Запольский село Николаевка вторая, Херсонского уезда;

диакон Георгий Миронович убит одновременно с священником Смирягиным.

                 (Одесский листок, 1920, 1-го(1) января, №1, скорбный список)

С Л У Ж Б А

священномученику Василию (Слотвинскому),

пресвитеру Нерубайскому (+1919)

 

НА ВЕЛИКОЙ ВЕЧЕРНИ

 

На Господи, воззвах: стихиры мученика, глас 4:

Наста, Богоносе отче, / солнца светлейший твой праздник, / озаряет приходящий к тебе верою, / и безсмертием облагоухает, / и душам источает исцеления, / Василие отче пречудне, // молитвенниче о душах наших.

Истинную веру соблюл еси, / и за Церковь Христову от безбожников смерть вкусил еси, / ярости  и  злобе их предан был еси, / но не отступил еси от Господа своего, священномучениче Василие, / молися за нас Христу Богу нашему, // во еже и нам веру православную соблюсти неврежденно.

Мудрыми словесы и теплою любовию / паству твою закону Евангельскому научал еси, / яко подобает паче всех Христа любити / и верно Ему служити. / Делом совеса сии даже до смерти вся исполнил еси, // отче Васили всечестне.

Крест Христов житием своим прославил еси, / отче Василие Богоблаженне, / не убоялся еси хулителей и гонителей истины Божия, / паству свою не оставил еси, / не устрашившись велений безбожных, / на  смерть  свою яко на  пасху Господню шествовал еси, / и нас утверди в любви Божией // твоими теплыми молитвами.

Слава, глас 8:

Слава мучеников показался еси Василие досточудне, / крест бо Христов подвижнически восприявши, / поприще мучения претекл еси, / и со славою очищение кровию своею совершивши, / яко чист сый Чистому предстоиши Христу, / со всеми святыми веселяся, // и моляся за нас ко Господу.

И ныне, Богородичен: Царь Небесный:

Вход. Прокимен дне и чтения.

Пророчества Исаиина чтение (глава 43):

 Тако глаголет Господь: вси языцы собрашася вкупе и соберутся князи от них. Кто возвестит сия в них или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину; будите Ми свидетели, и Аз Свидетель, глаголет Господь Бог, и Отрок, Егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляли; сотворю, и кто отвратит то? Сице глаголет Господь Бог, избавляяй вас Святый Израилев.

Премудрости Соломони чтение (глава 3):

 Праведных души в руце Божией, и не прикоснется их мука; непщевани быша во очесех безумных умрети, и вменися озлобление исход их, и еже от нас шествие - сокрушение; они же суть в мире. Ибо пред лицем человеческим аще и муку приимут, упование их безсмертия исполнено; и, вмале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему; яко благодать и милость в преподобных Его, и посещение во избранных Его.

Премудрости Соломони чтение (главы 5 и 6):

 Праведницы во веки живут, о Господе мзда их, и попечение их у Вышняго: сего ради приимут царствие благолепия и венец доброты от руки Господни, зане десницею покрыет я и мышцею защитит их. Приимет всеоружие - рвение Свое, и вооружит тварь в месть врагом. Облечется в броня правды и возложит шлем - суд нелицемерен. Приимет щит непобедимый - преподобие. Поострит же напрасный гнев во оружие; споборет же с Ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь падут грады; вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте; навыкните, судии концев земли. Внушите, держащии множества и гордящиися от народов языков: яко дана от Господа держава вам, и сила от Вышняго.

На стиховне стихиры, глас 1:

Сокрушаему твоему телесе, / радовался еси, мучениче славне Василие, / страданьми бо попрал еси главу вражию, / и сокрушил еси безбожных шатания, / и шествовал еси крепко стезею Небесною, // Владыце победоносец явлься, отче всехвальне.

Стих: Священницы Твои облекутся в правду, / и преподобнии Твои возрадуются.

Озарися весь Нерубайская / светом подвига твоего, / страстотерпче Христов Василие, / от Господа пастырю прославленный, / удостой и нас созерцания света невечерняго // твоими теплыми ходатайствы.

Стих: Внидем в селения Его, / поклонимся на место, идеже стоясте нозе Его.

Верен Богу и Церкви был еси даже до смерти, / священномучениче Василие, / ныне же, с лики небесными предстоя́ Христу Царю, / моли́ся с ними прилежно // дарова́ти нам мир и велию милость.

Слава, глас тойже:

Да торжествует Твоя Церковь, Христе, / укра́шенная сонмом славных мучеников, / жизнь свою Тебе предавших / и от Тебе жизнь вечную получивших; / их молитвами Долготерпеливе, Человеколюбче Господи, // в правоверии нас сохрани до скончания века.

И ныне, Богородичен, глас тойже:

Небесных чино́в ра́дование, / на земли́ человеков крепкое предста́тельство, / Пречистая Дево, спаси́ нас, и́же к Тебе прибегающия, // яко на Тя упование по Бо́зе, Богородице, возложи́хом.

Тропарь глас 2:

Изряднаго в пастырех и славнаго в мученицех, / Православия поборника и благочестия ревнителя, / земли́ Херсонския кра́сное прозябение, / Василия иерея всечестнаго прославим, / иже страданием Небесе́ дости́же / и тамо ныне те́пле мо́лит Христа, // во еже спастися душа́м нашим.

 

НА УТРЕНИ

По 1-м стихословии седален, глас 4:

Болезньми и страдании твоими, отче Василие, Бога прославил еси / и ходатай верный о нас явился еси. / Сего ради с любовию вопием тебе: // не престай моли́тися о чтущих святую память твою.

Слава, и ныне, глас тойже:

Едина истинная христиан Покровительнице, / всяких лютых обстояний, / бед и скорбей нас избави // и молитвами Твоими спаси души наша.

По 2–м стихословии седален, глас 6:

Сквозе́ огнь мучения, яко свидетель верный, прошел еси, / блаженне Василие, / сего ради с лики святых в Небеснем Отечестве торжествуеши. // Помози и нам быти верными Христу и спастися душам нашим.

Слава, и ныне, глас тойже:

Устами и сердцем величаем Тя, / Дево Мати: / Ты же, рождшая Бога, // не отрини нас от Твоего заступления.

Величание:

Величаем тя, / священномучениче отче Василие, / и чтим честная страдания твоя, // яже за Христа претерпел еси

Псалом избранный:

1-й лик: Исповемся Тебе, Господи, всем сердцем моим о милости Твоей и истине Твоей.

2-й лик: Господь Помощник мой, на Него упова сердце мое, и исповемся Ему.

1-й лик: Поношения поносящих Ти нападоша на мя.

2-й лик: Изведи из темницы душу мою исповедатися имени Твоему.

1-й лик: На Бога уповах, не убоюся, что сотворит мне человек.

2-й лик: Исповемся имени Твоему, Господи, яко благо, яко от всякия печали избавил мя еси.

1-й лик: Глаголах о свидениих Твоих пред цари и не стыдяхся.

2-й лик: От бездн земли паки возвел мя еси, ибо аз исповемся Тебе в людех, Господи.

1-й лик: Веселитеся, праведнии, о Господе и исповедайте память святыни Его.

2-й лик: Да исповедятся Тебе, Господи, вся дела Твоя.

По полиелеи седален, глас 8:

 

О новый угодниче Церкве нашея! / Прославляюще подвиг твой, приносим ти песни похвальныя, / почитаем страдания твоя, Василие всечудне, / и с любовию вопием тебе: / спасай нас молитвами твоими, // присный наш предстателю.

Слава, и ныне, глас тойже:

Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси // молитвами Твоими, Пречистая.

Таже степенна, 1-й антифон, глас 4. Прокимен, глас 4: Возвеселится праведник о Господе / и уповает на Него. Стих: Услыши, Боже, глас мой, внегда молитимися к Тебе. Всякое дыхание: Евангелие от Матфея, зачало 36.

По 50-м псалме стихира самогласна, глас 6:

Душевная и телесная страдания твоя / и смерть за Господа от безбожных / отверзоша тебе, свя́те Василие, врата́ жизни вечныя / и укрепиша верныя исповедати Христа. / Емуже со дерзновением молися // в любви Его утвердити души наша.

Канон святому, глас 2:

Песнь 1

Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, // яко прославися.

Воли Божией послушли́в быв, / священства дар приял еси, Василие блаженне, / и, за Христа даже до смерти пострадав, / верный сын Церкве явился еси.

Иерусалима Вышняго взыска душа твоя, / к немуже неуклонно в житии твоем шествуя, / соделался еси гражданином Небеснаго Отечества, Василие Богомудре.

Имамы тя молитвеника крепкаго к Богу. / Темже, отче преславне, / воздежи чи́стии твоя руце и испроси нам у Господа благодать / в заповедех Его неуклонно ходити.

Богородичен: Неболезновавшая чревом, родшая Христа Господа, / мольбами Твоими матерними исцели болезни душ и телес наших, / да благодарно Сыну Твоему приносим победную.

Песнь 3.

Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, // и несть праведен паче Тебе, Господи.

Егда прии́де  испытание  веры твоея, Василие старче предивный, / страдание за Христа,  яко благодатный дар, приял еси / и кровию твоею ризы твоя убелил еси.

Лику мученическому сопричисленный, / жертвою непорочною явился еси, святе Василие, / буди молитвенник теплый и предстатель непостыдный о душах наших.

Церкве Христовы пастырь добрый быв, / поругания, насмеяния и лжесвидетельства претерпел еси / и безбожники кротостию и смирением обличил еси, / Василие страдальче изрядный.

Богородичен: Ангелов удивление, человеков дерзновение, Богородице Чистая, Приснодево, / моли Христа Бога, спасти непрестанно Тя блажащия.

Седален, глас 1:

Кровь твою, яко алавастр мира, Христови принесл еси, священномучениче Василие.  / Темже преблагий и великий Дарователь Бог прият тя в Небесныя обители, // сего ради память твою с верою почитаем, досточудне.

Слава, и ныне, глас тойже:

Упование христиан, Пресвятая Дево, / Егоже родила еси Бога, паче ума же и слова, / непрестанно моли с вышними Силами / подати оставление грехов наших всех // и исправление жития верою и любовию присно Тя славящим.

Песнь 4.

Ирмос: Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: // слава силе Твоей, Господи.

Облеклся еси в священныя одежды, отче Василие, / яже в подвизе исповедания чисты сохранил еси, / темже, вшед в чертог Небесный, / зриши Лице Света Неприступнаго.

Христу Иисусу, Агнцу Божию, служити хотя, / приял еси за Него смерть страдальческую, / и, восходя от земных в Горняя, приял еси венец победный.

Умом твоим чистым созерцая славу Господню, / тоя причастился еси совершенно, Василие Богоблаженне, / страданием отшед от временных к пребывающим.

Богородичен: Песньми, Всепетая Дево Марие, / ро́ди христианстии почитают Сына Твоего Пребожественнаго, любовию поюще: / слава силе Твоей, Господи.

Песнь 5.

Ирмос: Света подателю и веков Творче, Господи, / во свете Твоих повелений настави нас; // разве бо Тебе иного бога не знаем.

Святому алтарю предстоя, о иерею Христов Василие, / умом в горняя возносился еси, / идеже мучеников собор пред Святым Божиим Престолом вопиет: / разве бо Тебе иного бога не знаем.

Яко луч Солнца Правды явился еси, Василие, / и страданьми твоими осиял еси верных сердца.

Светом Пресущным просвещенный, / воспламенился еси любовию Божественною / и явился еси светильник пресветлый, облистающий безбожия нощь.

Богородичен: Льщением человекоубийцы древняго праотцы наша от Присносущныя Жизни отпадоша: / Рождеством Твоим, Чистая, земнороднии вси паки в рай восхищенни быхом.

Песнь 6.

Ирмос: В бездне греховней валяяся, / неизследную милосердия Твоего / призываю бездну: // от тли, Боже, мя возведи.

Исполнися на тебе глагол Христов, / аще Мене изгнаша и вас ижденут. / Темже, уготовав душу твою во искушение, / страдания и смерть за Господа претерпел еси.

Восприим меч духовный, иже есть глагол Божий, / козни безбожных сокрушил еси, Василие всечудне, / и вся разжженныя стре́лы лукаваго угасил еси щито́м веры Православныя.

Благоухает дарами Духа Всесвятаго священная память твоя / и изливает присно, я́коже исто́чник чи́стый и благово́нный, / еле́й богоприя́тных моли́тв твои́х, Василие всечестне, / имиже отгоняются недузи от верных и здравие требующим да́руется.

Богородичен: Исполнися на Тебе пророчество Симеоново и оружие про́йде душу Твою, / темже мучеником и исповедником Стена Нерушимая / и Помощь присно бываеши, Богомати Всечистая.

Кондак, глас 2:

Пастыреначальнику Христу подражая, / за вруче́нное ти стадо душу свою положил еси́, / Василие му́чениче всеславне, / молитвами твоими паству твою соблюди́ / невредиму от всех навет вражиих, да зовем ти: // Ра́дуйся, Церкви нашея похвало и теплый наш предстателю.

Икос:

Александрийския земли светильника чуднаго, / ве́си Нерубайския похвалу и утверждение, / Василия священнаго мученика восхваляюще, / Спасу Христу благодарственное приносим пение. / Ты же, яко пастырь добрый, душу за овцы словесныя положивый, / в ве́ре, наде́жде и любви́ утверди́ нас, зову́щих: / Ра́дуйся, Церкви нашея похвало и теплый наш предстателю.

Песнь 7.

Ирмос: Юноши благочестивыя пещи огненней приобщившияся, / шумящ дух росный невредимы сохрани, / и Божия ангела снизхождение. / Темже в пламени орошаеми благодарственно воспеваху: // препетый отцев Господи и Боже, благословен еси.

Исткав себе нетления одежду мучением, / весь во страданиих красен был еси, Василие, / и врага посрамил еси, поя: / препетый отцев Господи и Боже, благословен еси.

Житие твое Божественно, жизнь боголепна / и славна смерть, мученическими сияя добротами, / чудес светлостьми озаряя сердца поющих: / препетый отцев Господи и Боже, благословен еси.

Яко всесожжение священно, / яко приношение, отче, приятно и жертва совершенна, / плотию пострадавшему Спасу Христу принеслся еси, Василие, / радостно взывая: / препетый отцев Господи и Боже, благословен еси.

Богородичен: Тьмою лютою жития объят быв: / Твоею светлостию, Дево Марие, разреши тьму прегрешений / и озари пети достойно Сыну Твоему и Спасу мира: / препетый отцев Господи и Боже, благословен еси.

Песнь 8.

Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющыя: // благословите, вся дела Господня, Господа.

Безкровны жертвы Богу принесл еси / и пожерлся еси, яко агнец чист и непорочен; / ярость богоборцев посрамил еси, / Богу взывающи: благословите, вся дела Господня, Господа.

Рая житель Божествен быв, / и святых Ангелов явился еси сопричастник, мученическою сияя светлостию, / поеши Христу во славе неизреченней: / благословите, вся дела Господня, Господа.

Вооружил еси словесы твоими Церковь Христову, Василие мудре, / и утвердил еси страданьми твоими, / темже побеждает всегда нашествие безбожных / и победоносно Христу поет, взывающи: / благословите, вся дела Господня, Господа.

Троичен:  Яко  Единицу естеством,  Тя  пою,  Божество Всесвятое, / в триех ипостасях Единаго Создателя, радуяся зову: / благословите, вся дела Господня, Господа.

Богородичен: Слово Отца Небеснаго Единосущное / от кровей Твоих девственных воплотися, Марие Чистая, / Емуже благодарственне зовем: / благословите, вся дела Господня, Господа.

Песнь 9.

Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: // тем всепетую Богородицу величаем.

Руками беззаконных убиен, / жертва благоприятная и вольное заколение Богу принеслся еси, святче Божий Василие. / Тем благодарне память твою почитаем.

Светоносную память радостотворнаго жития твоего со святыми празднуем / душами просвещаемся и причастницы Света Небеснаго являемся, / посему песнеными похвалами тя, Василие, достойно ублажаем.

Яви тя Господь, святе Василие, единаго от новомучеников, / иже в последняя лета ко Христу кровьми своими пришедших / и ныне на Небесех молящихся о спасении душ наших.

Троичен: Триипостасный Боже наш, / новых мучеников Твоих приемый подвиги и преславно увенчавый их, / тех предстательством спаси воспеватели Твоя / и сподоби нас вечно славити Державу Твою.

Богородичен: Глас Тебе ангелов, Пречистая, вопием: / радуйся, спасение всех человеков / и славных мучеников Божественное венчание.

Светилен:

Предстоящи ныне Трисиянному Великому Свету / и пребывающе в неизреченней светлости со всеми святыми, / помяни всех нас, Василие всечестне, / память твою светоносно совершающих.

Слава, и ныне, Богородичен:

Света Превечнаго родила еси нам, Христа, Бога нашего, Пречистая Дево, / избавльшаго весь мир от лести диавола. / Темже молим Тя: не престай Его молити, / да подаст нам милость Свою.

На хвалитех стихиры, глас 4:

Водворился еси в дому Господни / и яко финикс благодатию процвел еси / и яко кедр добродетельми умножился еси, / и яко маслина плодовитая, / в саду райстем рукою Божиею насадился еси, // достоблаженне отче Василие.

Червлеными мученическими ризами, / яко виссоном многоценным украсился еси / и на брачную вечерю Господню со избранными вшел еси, / идеже выну веселяся, не забуди нас, / во юдоли плачевней пребывающих, // добропобедне отче Василие.

Не довлеет похвала наша к величию твоему, / священномучениче Василие всечестне, / слава бо твоя паче солнца вещественнаго сияет / и радость неизреченная боголюбивое сердце твое исполняет, // торжествуеши бо в Церкви святых, преславне отче.

Богоблаженне мучениче Василие, / от земли преставився, востекл  еси  к Небесным, / и в Горних жити селениих сподобился еси, / жизнь свою всецело Христу отдав, / Егоже ныне моли // даровати душам нашим мир и велию милость.

Слава, глас 8:

Наста днесь славная память твоя, / священномучениче отче Василие, / созывающи нас к благохвалению / пастырских подвигов твоих / и к славе укрепльшаго тя на страдание Христа, Бога нашего, / к Немуже имея дерзновение, / молися прилежно о всех нас.

И ныне, глас тойже:

Владычице, приими молитвы раб Твоих / и избави нас // от всякия нужды и печали.

Славословие великое и отпуст.

 

НА ЛИТУРГИИ

Прокимен, глас 4: Святым, иже суть на земли Его, / удиви Господь вся хотения своя в них. Стих: Презрех Господа предо мною выну, / яко одесную мене есть, да не подвижуся. Апостол к Галатом, зачало 214. Аллилуиа, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь. Евангелие от Иоанна, зачало 51.  Причастен: В память вечную будет праведник, от слуха зла не убоится.

МОЛИТВА

Дивный мучениче Христов и пастырю честный Василие! Ныне почитающе святую память твою, к тебе мы усердно прибегаем и во умилении сердец наших молимся.

Испроси нам благодать, просвещающую нас, да ею осеняеми, в вере и благочестии, в подвизех целомудрия и любви преуспевати будем и Христу в ближних Его служити неленостно потщимся.

Моли убо Спаса нашего, отче всечестне, да сподобит нас странствие наше земное непреткновенно совершити, и в мире и покаянии житие наше проводити, да тако на земли поживше, вечныя и блаженныя жизни на небеси сподобимся и тамо с тобою и со всеми святыми вкупе восхвалим Троицу Единосущную и Нераздельную, и воспоем Едино Божество и Царство, Отца и Сына и Святаго Духа во веки веков. Аминь.

 

АКАФИСТ

Священномученикам Иакову, Александру, Феодору и Василию.

 

Кондак 1

   Избрании священномученицы земли Александрийския, во времена последняя явленные, кровьми своими веру запечатлевшии и сим венцы нетленныя приявшии, величающе прославльшаго вас Господа, похвальная пения дерзаем вам приносити и во умилении душ наших вопием:

Радуйтеся, священномученицы Иакове, Александре, Феодоре и Василие, воины Христовы непобедимии.

 

Икос 1

   Ангелов сонмы возрадовашася, егда житница небесная обогатися класами полными, яковыми же вы явилися есте, священномученицы прехвальнии. Мы же, недостойнии, на земли живущии, Господа Иисуса Христа зело возблагодариша, егда яви нам подвиги ваша во славу Имене Своего святаго. Сего ради приимите от нас пения сицевая:

Радуйтеся, пастыри на ниве Христовей усерднии;

радуйтеся, звезды на тли небесней немерцаемии.

Радуйтеся, души свои за Христа положившии;

радуйтеся, жизнь вечную обретшии.

Радуйтеся,  ангелов немолчнии собеседницы;

радуйтеся, за ны приснии молитвенницы.

Радуйтеся, во страданиих, яко в горниле испытаннии;

радуйтеся, кровьми своими убеленнии.

 

Кондак 2

   Видя Господь добродетели родителей ваших, священномученицы честнии, посла вас яко плоды добрии на ветви, от корене Христова питающиися. Мы же, Премудрость Христову в сем зряще, вопием Ему: Аллилуия.

Икос 2

   Разум Христов имущи, священномучениче Иакове, и веру в Господа Единаго, Ему служити пламенне возжелел еси, от лет младых у храма Божия приметаяся и молитвою душу свою обогащая. Егда же сан священный восприят, пастырь добрый явился еси. Темже, почитающе житие твое во Христе, с радостию вопием ти:

Радуйся, слова Божия проповедниче;

радуйся, душ юных в житии добрем наставниче.

Радуйся, во алтари церковнем с благоговением предстоявый;

радуйся, яко ныне пред Престолом Божиим со дерзновением молишися.

Радуйся, литургии ревностный совершителю;

радуйся, благочестиваго жития ревнителю.

Радуйся, любовь паствы твоея стяжавый;

радуйся, мудрость духовную имевый.

 

                                                                    Кондак 3

   Силою Божиею укрепляемии, священномученицы Иакове, Александре, Феодоре и Василие, не убоялися испытаний, восставших на вы и на Церковь Христову на земли. Сего ради ныне на небеси радуетеся, воспевая прославльшему вас Владыце Христу: Аллилуия.

 

Икос 3

   Имея желание, священномучениче Александре, житие свое в молитве, труде и послушании проводити, во обитель Успения Божия Матере вселился еси. Бог же Всеблагий о тебе промышляя, ин путь тебе уготова и пастырем на ниве Своей тебе содела. Мы же, сему дивящеся, вопием ти:

Радуйся, волю Господню о себе исполнивый;

радуйся, во пресвитерстве благочестно поживый.

Радуйся, Закона Божия в юных душах насадителю;

радуйся, молитвы делателю и учителю.

Радуйся, пламене Божественнаго отражение;

радуйся, веси Ивановския украшение.

Радуйся, Богом данныя таланты в себе умноживый;

радуйся, веры своея во испытаниих не посрамивый.

 

Кондак 4

   Бурю воздвиже враг рода человеча на Церковь Христову в земли нашей, хотя сокрушити силу ея. Господь же яви Вас, священномученицы славнии, яко столпи непоколебимии противу козней его. Вы же в Нем Одном упование свое имущии, вопияли есте Ему непрестанно: Аллилуия.

 

Икос 4

   Слышавше, священномучениче Феодоре, яко был еси отец семейству немалу, обаче заботы житейския не  угасиша единаго на потребу души твоея, дивимся зело. Ты бо душепопечитель ревностный о пастве твоей явился еси, малыя церкви твоея заботою не оставляя, та бо бысть образ жития добраго для духовных чад твоих. Сего ради подвиг твой воспевая, дерзаем приносити ти сицевая:

Радуйся, пастырю, от Бога призванный;

радуйся, Духом Святым напитанный.

Радуйся, благочестиваго корене отрасль честная;

радуйся, молитвы трубо благозвучная.

Радуйся, службы Божия благоговейный совершителю;

радуйся, дисциплины церковныя усердный блюстителю.

Радуйся, труды многи в житии твоем подъявый;

радуйся, в Бозе Единем отдохновение имевый.

Радуйтеся, священномученицы Иакове, Александре, Феодоре и Василие, воини Христови непобедимии.

 

 

Кондак 5

   Боготечныя звезды в земли Александрийстей явилися есте, священномученицы Иакове, Александре, Феодоре и Василие, подвиги вашими ю освятившии и путь следования за Христом до конца показавшии. Мы же недостойнии праведныя труды ваша восхваляюще, вопием Богу: Аллилуия.

 

Икос 5

   Видев, священномучениче Василие, ветхость Дому Божия, идеже службу немощно совершати, возскорбе душа твоя. Сего ради испросил еси благословения Божия и ходатайствова о возведении новаго благолепнаго храма. Сию ревность праведную почитающе, зовем ти тако:

Радуйся, иерее Божий благоговейный;

радуйся, любве ко Господу исполненный.

Радуйся, пастырю любвеобильный;

радуйся, и домашния церкве твоея воспитателю достойный.

Радуйся, о благолепии Дому Божия ревновавый;

радуйся, о возведении храмов усердствовавый.

Радуйся, о неимущих добрый попечителю;

радуйся, милостыни усердный творителю.

Радуйтеся, священномученицы Иакове, Александре, Феодоре и Василие, воини Христови непобедимии.

 

Кондак 6

   Проповедницы жития по Бозе есте вы, священноммученицы всехвальнии, и мужества пред лицем испытаний носителие. Взирающе бо, по глаголу апостола, на кончину вашу за Христа, имамы подражати вере вашей и взывати ко Господу: Аллилуия.

 

Икос 6

   Возсияли есте в сонме святых земли нашея, подвиги и труды, паче же мученическою кончиною за Христа светящи мирови, память бо ваша с похвалами велиими. Мы же, земнороднии, чтуще ю на всяк день, приносим вам сицевая:

Радуйтеся, собор святых Александрийских украшающии;

радуйтеся, землю нашу молитвами ограждающии.

Радуйтеся, светильницы, на свещенице церковнем возжжении;

радуйтеся, стяжавшии венцы нетленныя.

Радуйтеся, Царствия Христова наследницы;

радуйтеся, в житии по Бозе наставницы.

Радуйтеся, до конца претерпевшии;

радуйтеся, Истину до крове соблюдшии.

Радуйтеся, священномученицы Иакове, Александре, Феодоре и Василие, воини Христови непобедимии.

 

Кондак 7

   Хотение имея кийждо из вас, святии, не благ земных, но паче Царствия Небеснаго и жития вечнаго со Христом, единым упованием вашим. Сего ради мук телесных не убоялися есте, ведали бо, яко претерпевый до конца, той спасен будет, сего ради вопияли есте Богу: Аллилуия.

 

Икос 7

   Новую стезю жития твоего начат в веси Новопражстей, священномучениче Иакове, среди мрака безбожнаго свет Христов несущи. Тамо же ти венец мучений уготован бе, егоже ты с честию восприят. Мы же, на подвиг твой взирающе, поем ти тако:

Радуйся, древним мучеником подражавый;

радуйся, токмо на Христа уповавый.

Радуйся, пастырския совести воплощение;

радуйся, лика мученическаго веселие.

Радуйся, жребий свой со смирением приявый;

радуйся, славу святых сим улучивый;

Радуйся, на землю трудов твоих с Небеси взирающий;

радуйся, благословение на ню выну у Господа просящий.

Радуйтеся, священномученицы Иакове, Александре, Феодоре и Василие, воини Христови непобедимии.

Кондак 8

   «Странницы и пришельцы вси есмы на земли», - сие выну в мыслех имели есте, святии, сего ради житие земное без страха пред мучители вашими оставили есте, сего ради и Христос чертоги нетленныя вам уготова, идеже вы ныне поете Ему непрестанно: Аллилуия.

 

Икос 8

   Весь желание имея тела разлучитися и со Христом быти, священномучениче Александре, муки телесныя с радостию претерпевал еси, мучителие же твои лютее зверей хищных истязаша тя. Мы же, терпению непоколебимому твоему дивящеся и страдания за Христа ублажающе, приносим ти таковая:

Радуйся, агнче незлобивый, за Христа закланный;

радуйся, силы Господни в мучениих исполненный.

Радуйся, в канун Успения Пречистыя Владычицы в двери райския вшедый;

радуйся, сим Материю Царя Небеснаго почтенный.

Радуйся, земли нашея славо непреходящая;

радуйся, лампадо Света Божественнаго немерцающая.

Радуйся, молитвенниче наш дерзновенный;

радуйся, ходатаю спасения нашего усердный.

Радуйтеся, священномученицы Иакове, Александре, Феодоре и Василие, воини Христови непобедимии.

Кондак 9

   Всяк, слышай о житии и страдальчестей кончине вашей, священномученицы святии, дивится силе веры вашея, мужеству и терпению неизглаголанному: несть бо возможно прейти сие, аще не пребудет с ним Христос, Емуже глаголем во страсе Божии: Аллилуия.

Икос 9

   Витийство сильных изнеможе, аще начати хвалити тя, священномучениче Феодоре, страх бо твой пред Царем Небесным паче страха земнаго бысть, сего ради мук и смерти телесныя не убоялся еси, еже бо жити ти Христос и смерть – приобретение, яже апостол Божественный глаголет. Сего ради приими от нас таковая:

Радуйся, от врагов Христовых зело претерпевый;

радуйся, славою и честию на Небеси венчанный.

Радуйся, воли Божией послушателю;

радуйся, покорный ея исполнителю.

Радуйся, веру Христову яко камень краеугольный имевый;

радуйся, токмо на Господа взиравый.

Радуйся, Духом Божиим пламенеющий;

радуйся, и нам не угашати Его помогающий.

Радуйтеся, священномученицы Иакове, Александре, Феодоре и Василие, воини Христови непобедимии.

 

Кондак 10

   Спастися всякому человеку хотяй Христос, до конца испыта вас, яко злато в горниле, священномученицы Иакове, Александре, Феодоре и Василие, пройдя бо огнь мучений, ныне во Царствии Его радуетеся и вопиете немолчно: Аллилуия.

 

Икос 10

   Царя Небеснаго слуго верный и истинный в житии твоем был еси, священномучениче Василие, в седине мудрость и разум стяжав, аще и стар леты твоими был еси, дух бо твой зело пламенен бысть, сего ради и смерти от рук безбожник лютых не убоялся еси, единения со Христом Спасителем желая. Мы же, недостойнии, на милость Его уповающии, поем ти тако:

Радуйся, яко Господеви добре послужил еси;

радуйся, яко дух мирен стяжал еси.

Радуйся, твердый веры исповедниче;

радуйся, благочестиваго жития наставниче.

Радуйся, страдании земными не устрашенный;

радуйся, к сонму новомученик причтенный.

Радуйся, чертогов райских со всеми святыми наследниче;

радуйся, Света Небеснаго причастниче.

Радуйтеся, священномученицы Иакове, Александре, Феодоре и Василие, воини Христови непобедимии.

                                                                 Кондак 11

   Пение хвалебное возсылаем вам, священномученицы Иакове, Александре, Феодоре и Василие, благодаряще Бога, явившаго вас во утверждение веры православныя и в назидание нам, на земли живущим, како подобает следовати Христу, воспевающе Ему непрестанно: Аллилуия.

 

Икос 11

   Светозарныя лучи Солнца Правды Христа, Бога нашего, есте вы, священномученицы достохвальнии, озаряете бо всю страну нашу и ограждаете ю молитвами вашими. Мы же, аще и недостойни есмы, обаче любовию горящии, дерзаем от сердец наши возносити вам таковая:

Радуйтеся, Агнцу Божию в ризах белых предстоящии;

радуйтеся, миру всему, аки звезды, светящии.

Радуйтеся, страдальцы Христовы допропобеднии;

радуйтеся, мужества носителие неодоленнии.

Радуйтеся, яко мощми вашими земля наша освятися;

радуйтеся, яко лик мученический именами вашими пополнися.

Радуйтеся, Промысла Божия исполнение;

радуйтеся, величия и славы Его явление.

Радуйтеся, священномученицы Иакове, Александре, Феодоре и Василие, воини Христови непобедимии.

 

Кондак 12

   Благодати Господни носителие есте вы, священномученицы наши славнии, и образи жития по Бозе досточуднии. Мы бо, взирающе на вас, просим и нам помощи, дабы и самим хотя в малей толице добродетелей ваших подражати и вопити на всяк час Господеви: Аллилуия.

 

Икос 12

   Поюще память вашу честную, священномученицы Иакове, Александре, Феодоре и Василие, возсылаем хвалу Господеви Богу нашему, яко явил есть нам имена ваша и подвиг веры во Имя Его и дарова нам молитвенники и ходатаи пред Ним. Сего ради приимите от сердец, благодарения исполненных, таковая:

Радуйтеся, служителие Божии возлюбленнии;

радуйтеся, страдальцы Господни славнии.

Радуйтеся, Церкви Небесныя украшение;

радуйтеся, Церкви земныя ликование.

Радуйтеся, Истины столпи неподвижнии;

радуйтеся, адаманты духовнии непоколебимии.

Радуйтеся, звезды, тьму духовную освещающии;

радуйтеся, хлад греховный молитвами вашими отводящии.

Радуйтеся, священномученицы Иакове, Александре, Феодоре и Василие, воини Христови непобедимии.

 

Кондак 13

   О, святии священномученицы Иакове, Александре, Феодоре и Василие, во времена последняя из забвения людскаго Господем воззваннии, приимите пение наше малое, аще недостойными устны, обаче от сердец благодарных воспетое! Помозите нам в мире сем веру непорочно хранити и вся стрелы лукаваго молитвою крепкою отражати, в испытаниих же твердость духовную имети, заступлением же вашим святым Царствие Вечное наследити, идеже с вами Господеви воспевати выну: Аллилуия.

  

СХВАЛЕНО

Синодальною Літургічною комісією

Української Православної Церкви

 

 

митрополит Новокаховський і Генічеський,

голова Комісії

 

 

Тропарь и кондак

священномученику Василию Слотвинскому

 

Тропарь, глас 4:

От лет млады́х ду́хом моли́твенным напита́нный,/ в жела́нии Бо́гу служи́ти утверди́лся еси́,/ де́латель на ни́ве Христо́вой иску́сен быв,/ в седи́не му́дрость стяжа́в./ Егда́ же враг ро́да челове́ческаго на Це́рковь ополчи́ся,/ ты я́ко адама́нт непоколеби́м пребы́л еси́,/ священному́чениче Васи́лие,/ сего́ ра́ди му́ченическим венце́м украси́ тя Христо́с,/ Его́же моли́ спасти́ ду́ши на́ша.

 

Кондак, глас 8:

Я́коже свеща́ на све́щнице яви́лся еси́,/ в служе́нии пресви́терстем Бо́гу угожда́я,/ па́ству твою́ до́бре упа́сл еси́./ Во дни же испыта́ний, и́же на Це́рковь Святу́ю приидо́ша,/ столп непоколеби́м был еси́,/ те́мже, священному́чениче Васи́лие, венце́м побе́дным увенча́ тя Христо́с Бог/ Его́же моли́ спасти́ ду́ши на́ша.

 

 

 

 

 

 

 

 

 

 

 

 

 

 

 

 

 

 

 

 

 

 

 

 


Подпишитесь на нас в Telegram

Адміністрація сайту не несе відповідальності за зміст інформації, яка міститься в архівних матеріалах сайту, і може не поділяти точку зору їх авторів. Відповідальність за інформацію несе сторона, що її надала.
Інтернет-видання "Єпархія" (C) 2013-2022. Сайт розроблений: В.Коваленко, А.Чумаченко, А.Беляєв. При використанні матеріалів сайту обов'язковою умовою є посилання на alexandria-eparhia.org.ua